CAGAYAN DE ORO CITY-Nagdumili si Pres Rodrigo Duterte paghatag sa timeline kon kanus-a mahingpit ang pagpuhag sa teroristang Maute-ISIS nga nabilin sulod sa war zone sa Marawi City.
Gihimo ni Duterte ang pahayag nunot sa gibutyag usab sa militar nga sulod na lamang ning bulana ug malumpag na ang liderato sa mga terorista.
Namahayag si Duterte nga mas gustuhon pa niini nga motahan ang mga terorista samtang wala pa hingpit nahinayak ang militar sa pagpuhag kanila sa main battle area.
Samtang gitugutan ni Duterte si OPPAP Sec Jesus Dureza ug Defense Sec Delfin Lorenzana nga makig-koordinar sa wanted person nga si kanhi Marawi City Mayor Omar Solitario.
Kini alayon sa pagpatahan unta sa mga teroristang Maute-ISIS nga naghawid sa mga bihag sa Marawi City.
Gihimo ni Duterte ang pagtin-aw human gikontra sa militar ang impormasyon nga mismo si Solitario ang naghingusog sa Maute-ISIS nga motahan na lamang apan adunay lahi na nga mga demanda sa gobierno.
Si Solitario ang dakpunon sa pasangil nga nagsuporta-pinansyal sa pamilyang Maute aron atakehon ang Marawi City.
