CAGAYAN DE ORO CITY (update) – Gikompirmar ni Dominorog Barangay Kapitan Judith Ocum nga bangi sa yutang kabilin ang nag-unang hinungdan kon nganong gusto siya nga ipapatay sa Talakag,Bukidnon kagahapon sa buntag.
Sa exclusive interview sa Bombo Radyo kang Ocum, gibutyag niini nga namatay iyang bana nga si DATU BULBULATON GABRIEL OCUM niadtong Mayo 2019 samtang mitambong sa haya sa ilang paryente.
Gipusil ang iyang bana nga kanhi barangay kapitan sa maong lugar sa usa ka armadong suspek tungod kay may gisingil kini sa P300,000 nga wala pa mabayri batok sa ilang kabangi nila sa yuta.
Gumikan niini, nagtoo si Ocum siya ang target sa pagpamusil ug nadamay lamang ang mga biktima nga sila si Kag Lorenzo Pedyaan ug Mauricio Guinto.
Namugos si Ocum nga lig-on ang iyang mga i-presentar nga ebidensiya sa korte batok sa mastermind sa krimen. Nagtoo usab ang byuda nga ang nagpasaka kanila sa patung-patong nga kaso, mao ra usab ang utok sa krimen.
