CAGAYAN DE ORO CITY – Nakasugat gilayon sa suliran ang mga tinahasan sa city hall nga mohatag sa ayudang pinansyal alang sa mga natumbok nga mga pamilya nga grabeng apektado sa epekto sa enhanced community quarantine o ECQ ning syudad.
Kini human kulang-kulang ang impormasyon sa mga pangalan nga anaa sa listahan diin naglisod ang taga- CSWD pagtultol sa mga pinuy-anan sa angay hatagan sa ECQ special ayuda financial assistance.
Miingon si City administrator Teddy Sabugaa nga wala pa’y labot niini ang pagdoble-doble sa mga pangalan bisan kon gi-validate na kini sa DSWD-10 nga mga listahan.
Una nang gipaubos sa dry run sa cash distribution ang mga pamilya gikan sa kabarangayan sa San Simon,Baikingon ug Bayanga kagahapong adlawa.
Dugtong niini,mihangyo si Sabugaa sa mga kapitanes nga kompletuhon ang gikinahanglang mga impormasyon aron dili mausik ang panahon sa city workers nga gitahasan sa paghatag sa ayuda.
Samtang gitin-aw ni DSWD-10 spokesperson Joseph Manuel Aguja nga ila nang gitugyan sa naka-ECQ nga mga syudad ang paghatag sa ayudang pinansyal sa mga apektadong pamilya.
Kini human matunuli sa pondo gikan sa national govt ang Gingoog City ug Cagayan de Oro City alang sa maong katuyuan.
Miingon si Aguja nga maoy ilang trabaho na lamang ang pagmonitor sa ensakto nga pag-release sa maong pondo.
Hisayrang dinhi lamang sa syudad,anaa sa sobra gatus-mil ka pamilya ang tunulan sa kapin 700-milyon pesos nga ECQ special ayuda funds.
