CAGAYAN DE ORO CITY – Dili angay kalimtan ang dakong sakripisyo nga gihimo sa unang mga kaliwatang-Pilipinhon aron mabawi’g balik ang gihikaw nga demokrasya kay giharian sa 14 ka tuig sa pamilyang Marcos ang nasud.
Kini ang mensahe ni Akbayan Youth chairman Justin Balane nunot sa pagdumdom sa ika-39 nga anibersaryo ning adlawa kung giunsa pagsipa sa katawhan sa katungdanan si kanhi Pres Ferdinand Marcos Sr nga utok sa martial law sa nasud.
Miingon si Balane nga dili kabayran sa bugti sa salapi ang kaisog ug pagbarog sa mga tawo kaniadto nga nagtapok sa EDSA aron mohimo’g rebolusyon nga wala mogamit sa mga armas batok sa diktador.
Sulod ning adlawa,may himoon sila nga aktibidad sa kauluhan haom sa ika-39 nga tuig sa EDSA People Power 1 Revolution.
Samtang gihagit sa beteranong manunulat ug saksi sa grabeng tawhanong abuso sa martial law era nga si COPC Pres. Froilan Gallardo ang kabatan-unan nga mohimo sa pagsusi sa tinud-anay nga sugilanon sa EDSA People Power 1 Revolution.
Kini aron mas masayod sila kung giunsa sa pagsukol sa mga tawo kaniadto aron mabalik ang demokrasya nga gihikaw sa diktador nga si kanhi Pres Ferdinand Marcos Sr sulod sa 14 ka tuig.
Miingon si Gallardo nga dili na angay lalisan ang mga panghitabo kaniadto apan maoy tinguhaon sa kabatan-unan nga masuta ang tinud-anay nga rason kung nganong nabugto ang demokrasya ug napaubos ang nasud sa martial law.
Si Gallardo ang usa sa mga aktibista sa iyang panahon nga nahiagom sa grabeng pagpangabuso dinhi sa syudad.
Dugtong niini,mohimo sa mass demonstration ang mga tinun-an ug ubang lumilihok sa Xavier University Ateneo de Cagayan ning syudad unya sa hapon.
Kini agi’g pagduyog sa mga tunghaan sa Pilipinas nga mi-obserbar sa ika-39 nga tuig anibersaryo sa EDSA People Power 1 Revolution nga sumad ning adlawa.
Miingon si XU CSG Pres. Kyle Chester Cotacte nga mohimo una’g mga pag-lecture ang pipila ka paring Heswita karong buntag ug sugaton sa santos nga misa unya sa hapon.
Siya miingon nga mismo kini ang gusto usab mopaambit sa iyang nasabtan sa mensahe kabahin sa hitabo ngadto sa ubang kabatan-unan ning syudad.
