Natapos nga malinawon ang mga lihok protesta nga gipanguluhan sa human rights advocates dinhi sa syudad.
Kagahapon, gipanawagan sa nagkalainlaing civil society groups ug mga katawhan gikan sa lainlaing sektor ang pagtuldok sa halapad nga korapsyon ug ang pagpasar sa Anti-Political Dynasty Bill atol sa rally sa ika-40 anibersaryo sa EDSA People Power Revolution, inubanan sa gipahigayon nga “Trillion Peso March.”
Namahayag si Beverly Musni, Secretary General sa Union of Peoples’ Lawyers in Mindanao, nga ang bersyon sa anti-dynasty bill nga mapapasar kinahanglan walay pili ug dili protektahan ang interes sa mga politikanhong pamilya.
Matod niya, nagtuo ang ilang grupo nga lisod magpaabot og tinuod nga pagbag-o kon ang gahum sa gobyerno magpabiling nagtuyok lamang sa kamot sa pipila ka pamilya, ug miingon pa nga “walay igsoon nga musumbong sa iyang kaugalingong igsoon.”
Gikondena usab sa mga partisipante ang ilang giingong kawalay hustisya sa nasud ug ang padayon nga pag-abuso sa gahum.
Gidasig karon ni Musni ang katawhan nga suportahan ang bersyon sa anti-political dynasty bill nga gisulong sa Makabayan bloc, nga nagtugot lamang og usa ka miyembro sa matag political family nga makadagan sa eleksyon aron matuldokan ang korapsyon ug abuso sa gahum.
