Bisan pa man sa dakong pakigbisog sa mga miyembro sa LGBTQ community aron ilhon ang ilang katungod, gikumpirmar ni Atty. Samantha Tan nga skin-deep o mababaw gihapon ang pagdawat kanila sa katilingban.
Sa tinuoray nga kahimtang, padayon gihapon ang diskriminasyon sa mga tulunghaan diin adunay mga estudyanteng transgender o homosexual ang gipapahawa sa klase tungod lamang sa ilang uniporme.
Hinuon, gipadayag ni Atty. Tan nga kini usa ka pagpangyatak sa batakang katungod sa mga bata nga makakuha og edukasyon nga usa sa mga prayoridad sa 17 Sustainable Development Goals.
Tungod niini, namahayag siya nga ang pagpugong sa mga estudyante nga makatuon maoy usa sa mga hinungdan kon nganong naglisod ang atong ekonomiya ug dili kita hingpit nga ma-develop isip nasod.
Busa, gipahibalo sa abogado nga edukasyon ang bugtong epektibong pamaagi aron mahan-ay ang maong mga problema ug masulbad ang krisis nga giatubang sa Pilipinas karong panahona.
