Gihingusgan sa Philippine Movement for Climate Justice (PMCJ) Mindanao ang ensaktong edukasyon sa labing epektibong paagi sa pagsulbad sa problema sa basura sa syudad.
Namahayag si Pat Jared Pangantihon sa (PMCJ) Mindanao nga bisan pa man epektibo ang pagbutang sa Materials Recovery Facility (MRF) sa matag barangay aron mapraktis ang waste segregation, wala gihapon kini’y pulos kon ang mga katawhan kay pipila kanila walay kahibalo o disiplina sa insaktong paglabay sa nagkalain-laing klase sa basura.
Gikondenar ni Pangantihon ang batasan sa pipila ka katawhan nga maglabay sa basura sa dili insaktong basurahan, bisan pa man Bisaya na ang mga signage nga klarong nagpakita sa basurahan para sa malata ug dili malata.
Kini ang rason nga sa pagkuha sa basura, nagsagol na ang malata sa dili malata.
Siya usab miingon nga tungod kay dugay nang nabatasan sa mga katawhan ang pagpasagad sa nagtapun-og nga basura, posibleng lisod na kini mausab sa hinanaling panahon, gawas lang kung butangan sa ngipon ang balaod aron maleksyon ang mga hugawan ug tapulan.
