CAGAYAN DE ORO CITY-Iduso sa kapolisan ang kasong arson batok 30 ka sakop sa New People’s Army o NPA nga responsable pagsunog sa water tanker truck nga naharang sa road re-blocking sa Barangay San Juan,Balingasag,Misamis Oriental.
Kini human nasuta sa kapolisan nga tinuyo sa mga rebelde ang pagdaob sa maong truck nga gipanag-iya ni Felix Madronero nga nagdumala sa Andrew Trucking Service nga nakabase sa Agusan Canyon,Manolo Fortich,Bukidnon.
Gibutyag sa Bombo Radyo ni Balingasag Police Station commander C/Insp Jolito Caseres nga nagsilbing contractor si Madronero sa plantasyon sa Del Monte Philippines Incorporated (DMPI) nga nakabase sa maong lungsod.
Giangkon ni Caseres nga milutaw sa ilang pag-imbestigar nga ang pakyas paghatag buhis nga gipangayo sa mga rebelde ang hinungdan pagsunog sa truck sa biktima.
Dugtong niini,gikondenar sa militar ang tinalawan nga gihimo sa mga rebelde ngadto sa soft targets nga nakabase sa Misamis Oriental.
Gibutyag ni 4th ID spokesperson Capt Joe Patrick Martinez nga ang pagpangsunog sa mga rebelde ang epekto sa ilang pag-abog pinaagi sa 58th IB,Philippine Army sa mga presensiya niini sa dakong bahin sa lalawigan.
Si Martinez miingon nga angay lamang abugon ug gukdon ang mga rebelde tungod kay sila ang mihimo’g lapad nga sabotahe sa ekonomiya nga naglambo sa usa ka lugar.
Tak-om pa ang baba sa kampo sa mga rebelde kabahin sa hitabo ug pagkastigo kanila sa tropa sa gobyerno.
