Gipangayo sa ekonomista nga si John Vianne B. Murcia, PhD nga kinahanglang adunay transparency ug accountability ang gobyerno pinaagi sa pagpagawas sa mga batakang dokumento sa proyektong Pax Silica nga mahimong tan-awon sa publiko.
Gisugyot sa eksperto nga labing maayo kon mapagawas ang mga detalye bahin sa land area, ownership structure, water ug energy demand, apil na ang mga probisyon nga dunay kalabotan sa public interest aron malikayan ang mga problema sama sa nahitabo sa Bataan Nuclear Power Plant kaniadto.
Bahin sa mga lumopyo, gipatin-aw usab niya nga kinahanglang pahigayonan og tinuod nga public consultation ang host communities, academe, labor groups, ug indigenous peoples samtang mahimo pa kining mausab ang design sa proyekto.
Subay niini, gipasiugda usab ni Murcia ang kamahinungdanon sa post-approval monitoring aron masukod kon pila ka trabaho ang nahimo, pila ang local hires, ug unsa nga mga benepisyo sa komunidad ang opisyal nga nahatag sumala sa gisaad.
