Posibleng adunay dakong epekto sa ekonomiya ug mga proyekto sa imprastraktura sa Mindanao kon magdugay pa ang isyu nga naglibot sa Philippine Sanjia Steel Corporation, sumala ni Atty. Sonny Matula sa Federation of Free Workers.
Matud sa abogado, adunay posibilidad nga maapektuhan ang suplay sa steel bars nga gigamit sa nagpadayong government infrastructure projects ug ubang construction activities sa rehiyon kon dili dayong masulbad ang maong kontrobersiya.
Dugang pa ni Matula nga wala na usab karon ang National Steel Corporation, busa dako ang posibilidad nga mokunhod ang lokal nga tinubdan sa bakal nga importante sa mga konstruksyon sa nasud.
Gipasabot usab niini nga mahimong dili maayo ang mensahe niini ngadto sa mga foreign investors, ilabina kon kalit lamang mapasarado ang usa ka kompanya nga dugay nang nag-operate sa nasud.
Gibutyag pa sa labor leader nga kinahanglan masinop ug balansehon sa gobyerno ang pag-atubang sa isyu aron maprotektahan dili lamang ang industriya sa bakal kondili lakip usab ang trabaho ug panginabuhian sa mga mamumuo nga naapektuhan sa maong kahimtang.
