CAGAYAN DE ORO CITY – Daw naibtak tunok si re-elected Villanueva Mayor Jennie Uy-Mendez nunot sa iyang kadaugan batok sa kaabtang niini nga si 1st District Board Member Virgelia ‘Bing’ Dumadag sa miaging May 9 elections sa Misamis Oriental.
Kini human unang miduso’g election protest si Dumadag batok sa kadaugan ni Mendez sa milabay’ng piliay sa maong lungsod.
Gihimo sa mayora ang pahayag gumikan sa pagkabasura protesta ni Dumadag samtang nakasang-at ang kaso sa sala ni RTC Branch 41 Presideng Judge Joefre Acebido.
Namahayag si Mendez nga ang pabor nga gilugwa nga resolusyon sa huwes ang pagpamatood lamang nga limpyo ang iyang konsensiya,nagsubay kini sa kamatuoran ug ligdong ang prinsipyo sa pagpanerbisyo sa katawhan sa lungsod.
Samtang gibutyag usab ni Dumadag nga gitahod sa iyang kampo ang hukom sa korte.Apan siya nag-awhag sa katawhan sa lungsod nga dili angay limtan kon unsay nahitabo nga ilang nasaksihan samtang maisugon sila nakigtigi sa kaabtang niini sa politika.
Dugang niini nga wala daw wala pa natapos ang away ug giingong nagsugod pa lamang sila sa krusada alang sa tinud-anay nga kabag-uhan sa lungsod.
Hisayrang si Mendez ang nakakuha’g 11-mil 950 votes batok kang Dumadag nga may 10-mil 066 sa milabay’ng May 9 elections.
