Segun sa nagkadool nga Barangay ug Sangguniang Kabataan Elections (BSKE) karong umaabot nga bulan sa Nobyembre gihatagan ug kabug-aton ni Atty. Carlito Ravelo, Provincial Election Supervisor sa Misamis Oriental, ang kamahinungdanon sa pag-retrain sa mga electoral board alang sa umaabot nga piniliay.
Gumikan kay lahi ang pamaagi sa manual nga proseso karon itandi sa naandan, gikinahanglan matod pa nga masabtan sa mga magtutudlo ang mga lagda sa pag-apresyar sa balota o ang pag-ihap.
Gitin-aw usab niini nga delikado kung dili i-refresh ang kahibalo sa mga magtutudlo mahitungod sa mga legal nga aspeto sa pag-ihap, ilabi na alang sa mga balota nga dili klaro ang pagkasulat.
Kahinumduman nga daghan og mga lagda nga angay sundon base sa balaod aron masiguro ang husto nga pag-ihap sa mga boto.
Tungod niini, gikinahanglan matod pa ang maong pagbansay aron malikayan ang bisan unsang sayop atol sa pagpahigayon sa eleksyon.
