CAGAYAN DE ORO CITY – Wala isalikway sa Bureau of Fire Protection/BFP ang posibilidad nga ‘electrical ignition’ ang rason pag-ulbo sa kalayo sa ikaduhang andana sa Graphic Gadget Store Building sa Captain Vicente Roa Street,Brgy 24 ning syudad kagabii.
Kini subay sa sulti ni BFP-Cagayan de Oro City Fire Marshall Supt Rexcliburn Salvaña kabahin sa padayong pakisusi sa iyang mga imbestigador sa hitabo.
Gibutyag ni Salvaña nga wala sila’y nakit-an nga laing tinubdan sa kalayo sa nahitabuan rason nga hayan depektosong linya sa kuryente ang kabahin sa ilang gidudahang hinungdan.
Dumduman nga subay sa sulti usab ni BFP-Cogon Fire Station commander Senior Fire Insp John Ray Donasco nga partikular nga nalamoy sa kalayo ang magnet advertising,mismo ang Graphic office ingon man ang usa ka coffee shop.
Naugdaw usab ang daghang gadgets sa hitabo.
Molungtad pa sa pila ka semana ang imbestigasyon sanglit ipadala pa sa BFP-Manila ang ubang mga ebedensiya aron sutaon ang tinud-anay nga rason pag-ulbo sa kalayo diin mikostar sa 22 milyones pesos ang structural damage kagabii.
