CAGAYAN DE ORO CITY – Gitugyan na sa kagamhanang probinsyal sa Bureau of Customs o BoC ang 4-mil ka toners nga gamiton pag-rebag sa 5-mil ka basura sa Verde Soko Philippines nga natanggong sa Tagoloan,Misamis Oriental.
Kini human miprangka ang govt inter-agency task force nga maglisod sila’g pangita sa pondo aron magamit pagpalit sa toner bags nga masudlan sa mga basura pabalik sa South Korea.
Miingon si Sangguniang Panlalawigan board member Gregorio Sabal III,chairman sa enviroment committee nga mismo na si Gov Bambi Emano ang mitubag niini ug pagpahulam usab sa heavy equipment aron makargahan sa mga basura pasulod sa yarda sa Mindanao Container Terminal o MCT.
Samtang gikalipay ni Mindanao Container Terminal o MCT collector John Simon ang donasyon nga 4-mil ka toner bags gikan kang Emano.
Miingon si Simon nga nakompleto na ang 5-mil ka toner bags nga gikinahanglan human magdonar sa unang usa ka libo si 1st District MisOr Rep Juliet Uy.
Si Simon miingon nga ilang paningkamutan nga ma-ship pabalik sa South Korea ang 5-mil ka tonelada sa basura sulod ning tuiga bisan nga mano-mano ang ilang himoon nga pa-rebag niini.
Una nang gibutyag ni Simon nga dako nga trabaho ang himoon nga pag-repack, containerize ug pag-transport sa mga basura diha sa Brgy Sta Cruz,Tagoloan ning lalawigan.
