CAGAYAN DE ORO CITY-Gitawag ni Gov Bambi Emano nga walay hinungdan nga tawo si PDRRMD weather monitoring head Vergil Lago.
Kini human nabutang sa dakong kaulawon ang probinsya tungod sa pagkasikop ni Lago samtang giingong naghit-hit sa shabu sulod sa inn ning syudad sa miaging adlaw.
Miingon si Emano nga pagluwas sa kinabuhi sa tawo ang prioridad sa PDRRMD ug dili ang pagbisyo sa gidiling droga sama sa gihimo ni Lago hinungdan nasikop sa kapolisan sa miaging adlaw.
Samtang napasaka na sa kapolisan ang kasong paghupot ug paggamit sa gitoohang shabu batok kang PDRRMD weather
monitoring head Vergil Lago sa piskalya ning syudad.
Gibutyag ni SPO3 Jigger Rojo,imbestigador sa City Drug Enforcement Unit o CEDU nga positibo pagamit sa shabu si Lago hinungdan nga tulo ka kaso ang napasaka batok kaniya.
Gihulatan nila nga maduso sa korte ang mga kaso aron hingpit dad-on sa city jail si Lago.Una niini,nagdumili si Lago nga makuhaa’g pahayag kabahin sa giatubang niya nga kontrobersya.
