CAGAYAN DE ORO CITY – Giakusahan ni Vice Gov Jigjag Pelaez nga giipit siya ni Gov Bambi Emano pinaagi sa iyang mga alyado sa Sangguniang Panlalawigan kon hisgutan ang paggahin sa pondo alang sa tuig 2020.
Kini human gihimo na lamang P94,398,907 milyones pesos ang gi-alokar nga pondo sa Sangguniang Panlalawigan gikan sa 162,913,907 sa sunod tuig.
Miingon si Pelaez nga klaro nga pagpanimalos ang gihimo sa gobernador tungod sa kapildihan sa iyang brother-in-law nga si kanhi City Councilor President Elipe sa miaging May 2019 elections sa probinsya.
Gani,gihimo na lamang usab nga 7 milyon pesos ang maintenance and other operating expenses ni Pelaez gikan sa 53 million pesos alang sa tuig 2020.
Sa aprobado nga 3.6 bilyon pesos nga provincial budget nga gipangayo ni Emano sa tuig 2020,giwagtang sa majority members ang 68.5 milyon pesos niini nga magamit alang sa Sangguniang Panlalawigan.
Samtang dili trabaho sa bise-gobernador ang paghatag sa social services ug wala malatid sa Local Govt Code of the Philippines kay nakatahas lamang kini sa nakapungko nga gobernador sa usa ka lalawigan.
Kini ang depensa sa alyado ni Gov Bambi Emano nga si SP board member ug approprations committee chairman Wayne Militante kon nganong gikuhaan nila sa daku-dako nga pondo ang ilang buhatan.
Namahayag si Militante nga tungod sa pakyas nga presentasyon ni Vice Gov Jigjag Pelaez sa “Statement of Expenses”,dili usab nila matugutan nga aprobahan ang gipangayo nga pondo nga P94,398,907.00 alang sa sunod tuig.
Maoy gitumbok ni Militante ang kanhi liderato sa igsoon ni Pelaez nga si kanhi Vice Gov Joey Pelaez.
