CAGAYAN DE ORO CITY-Pabor si Environmental Management Bureau o EMB regional director Sabdullah Abubakar nga pasirad-an ang Boracay Island sulod sa unom ka bulan.
Siya miingon nga gikinahanglan kini sa isla aron ma-rehabilitate og tarong ilabina nga nadaut na kini pag-ayo.
Asoy pa niini nga kaayohan ra gihapon sa mga residente, negosyante ug turista ang temporaryong pagpasira sa maong isla.
Una nang gibutyag ni Abubakar nga bisan sila ang mihimo’g pagtoon sa sitwasyon sa maong isla ug ilang nasuta nga grabe na ka-polluted ang tubig.
Samtang gikumpirmar ni Abubakar nga ila nang gisugdan ang pag-imbestigar kung adunay mga beach resort nga susama kahugaw sa isla sa Boracay dinhi sa rehiyon.
Si Abubakar miingon nga wala pa siya’y nadunggan nga mga polluted beach resort apan mohimo gihapon sila’g imbestigasyon aron masayran kon nagsunod pa sa patakaran sa kinaiyahan ang mga negosyante.
Una nang nagbahad si Abubakar nga dili sila magpanuko nga ipasira ang mga beach resort nga dili mosunod sa mga gabayan.
