Gihanyo ni Cathy Estavillo sa Amihan National Federation of Peasant Women nga gamiton ni Pres. Ferdinand Marcos Jr. ang emergency powers aron suspindihon o ibasura ang Oil Deregulation Law of 1998 aron makontrol ang taas nga presyo sa petrolyo.
Matud niya, ang walay hunong nga pagsaka sa presyo sa langis nagdulot og domino effect sa tanan nga palaliton, lakip na ang kuryente, pamasahe, ug pagkaon, nga labi nga nag-apekto sa mga ordinaryong trabahante ug kabus.
Gipasabot ni Estavillo nga kinahanglan usab nga tangtangon ang excise tax ug VAT sa petrolyo ug siguruhon nga ang koleksyon sa buhis ibalik sa katawhan pinaagi sa mga support subsidies sa presyo sa bugas, palay, ug pamasahe sa mga transportasyon.
Dugang pa niya nga ang gobyerno kinahanglan magpahimutang og programa aron maminusan ang production cost sa agrikultura, aron ang mga mag-uuma makapadayon sa pagtanom ug makasuporta sa pagkaon sa publiko.
Busa gi-awhag sa Amihan nga hatagan og prayoridad sa gobyerno ang ekonomikanhong kaluwasan sa katawhan ug protektahan ang mga kabus gikan sa epekto sa taas nga presyo sa petrolyo ug uban pang palitunon. (By James Oliver)
