Gibutyag sa International Monetary Fund (IMF) nga lig-on gihapon ang ekonomiya sa Asia sa pagsugod sa tuig apan ang bag-ong energy shock magdala sa negatibong epekto sa rehiyon.
Kini ang gibutyag ni Krishna Srinivasan, director sa IMF Asia ug Pacific Department, nga tungod sa taas nga fossil fuel intensity ug pagsalig sa imported nga enerhiya, sensitibo ang Asia sa pagsaka sa presyo sa lana ug gas nga dala sa gubat sa Middle East.
Gipahayag sa opisyal nga mas kusog pa kaysa gilauman ang pagtubo sa kadaghanan sa mga ekonomiya sa Asia sa ulahing bahin sa 2025, nga gipalig-on sa kusog nga demand sa tech goods ug trade diversification.
Apan gibanabana nga ang economic growth sa Asia mokunhod gikan 5% sa 2025 ngadto 4.4% sa 2026 ug 4.2% sa 2027.
Sa blog post sa IMF, giingon nga ang China ug India mopuno og 70% sa pagtubo sa Asia.
Miabiso si Srinivasan nga ang near-term nga buluhaton mao ang pag-absorb sa shocks samtang mapreserbar ang policy credibility, ug sa medium-term ang pagtukod og mas lig-on, balanced ug inclusive nga growth model.
