Nagpahayag og dakong kabalaka ang environmentalist ug Task Force Macajalar convenor nga si Orlando Ravanera kabahin sa kontrobersyal nga commercial development sa Manresa property sa Xavier University–Ateneo de Cagayan nga gidevelop uban sa Cebu Landmasters Inc. pinaagi sa Manresa Town Project.
Matud niya, posibleng mawala ang mini forest sulod sa maong lugar.Sumala kang Ravanera, mokabat sa 40 ka klase sa langgam ang posible mawad-an og puy-anan tungod sa 20 ka ektarya nga mini forest sa Manresa nga maapektohan sa proyekto.
Sa iyang panayam sa Bombo Radyo, iyang gipahinomdoman ang mga kadagkoan sa maong proyekto pinaagi sa mensahe ni Pope Francis nga paminawon ang paghilak sa kalibutan ug ang pag-antos sa mga kabus.
Matud pa ni Ravanera, nagkahiusa sila sa nagkalain-laing concerned groups sama sa coalition nga Concerned XU Parents, Teachers, Alumni, and Community (COPTAC) sa pagsupak sa proyekto tungod sa kahadlok nga mosamot ang pagkawala sa green spaces sa dakbayan.
Gipasabot usab niini nga importante nga dili mapulihan sa commercial structures ang nahibiling lasang sa Manresa tungod kay dakong kabahin kini sa ecological balance ug proteksyon sa komunidad sa uptown Cagayan de Oro, ilabi na sa panahon sa tingbaha.
