CAGAYAN DE ORO CITY-Gikalipay ni Misamis Occidental Provincial Police Office Director Sr/Supt Jeysen de Guzman nga balik-serbisyo na si C/Insp Jovie Espenido sa Ozamiz City Police Station.
Kini human pahamtangi’g 90 ka adlaw nga preventive suspension tungod sa kasong administratibo nga giduso kaniadto ni TV actor Ormoc City Mayor Richard Gomez sa National Police Commission o NAPOLCOM.
Gibutyag ni De Guzman nga mi-apelar si Espenido sa maong suspension kuyog ang laing duha pa ka police officers nga kanhi niya kauban sa Albuera Police Station sa Leyte.
Una niini,nagpagawas mando usab ang PNP-Camp Crame nga isibog una ang 90 ka adlaw nga suspension order batok Espenido hinungdan nga balik-serbisyo kini sa Ozamiz City Police Station.
