CAGAYAN DE ORO CITY- Makig-estorya ang kontrobersyal nga si Ozamiz City Police Station commander C/Insp Jovie Espenido kang Iloilo City Mayor Jed Mabilog.
Kini kon ugaling tahasan si Espenido sa kadagkuan sa PNP nga sunod nga ma-destino sa Iloilo City gikan sa Ozamiz City.
Gihimo ni Espenido ang pahayag dihang naipit sa pangutana sa prensa kon asa niini gusto nga sunod madestino kon mahuman na pagsulbad ang paghawid mga Parojinog sa giingong pagpayuhot sa gidiling droga sa Ozamiz.
Si Mabilog ang usa sa mga gipanganlan ni Pres Rodrigo Duterte nga nalambigit sa narco-politics sa Western Visayas.
Samtang giawhag ni Espenido ang narco-politicians ilabina sa mga mayor nga mo-resign na lamang sa ilang mga katungdanan.
Gihimo ni Espenido ang hangyo sa mga politiko nga nalambigit sa gidiling droga aron motaas pa ang ilang pagpakabuhi sa kalibutan.
Gibutyag ni Espenido nga seryoso kini sa iyang trabaho batok sa gidiling droga hinungdan nga angay magbag-o na ang mga politiko nga gipanganlan ni Pres Rodrigo Duterte sa iyang 2017 updated narco-list.
