CAGAYAN DE ORO CITY- Gipanganti ni Ozamiz City Police Station commander C/Insp Jovie Espenido nga dili na niini lung-an ang paggukod sa nabiling sakop sa Parojinog criminal group nga naglihok sa Misamis Occidental.
Gihimo ni Espenido ang panganti human gikanselar ang iyang pagka-destino padulong sa Iloilo City Police Office sa Western Visayas.
Gipasalig ni Espenido nga ihatag ang nahikaw nga hustisya sa mga Ozamiznon tungod sa gihimong pagpanghadlok ug pagpahimulos sa gahom sa mga Parojinog.
Una niini,hugot gihimakak sa pag-umangkon ni late City Mayor Reynaldo ‘Aldong’ Sr nga si Schilley Parojinog nga pulos bakak ang tanang gipanulti ni Espenido batok sa ilang kaliwatan.
Samtang ipiton ni Espenido ang pipila ka brgy kapitanes nga pabiling naghimo’g ilegal nga kalihukan.
Kini ang dugang panganti ni Espenido tungod sa padayong pagmagahi sa mga kapitanes nga nagpagamit sa mga Parojinog aron matabunan ang mga dagkong kremin sa maong syudad.
Namahayag si Espenido nga dili niya undangan hangtod nga makuha ang mga kapitan nga nagpagamit sa mga kalihukang ilegal sa Ozamiz City.
