CAGYAN DE ORO CITY-Ihatag sa PNP ang angay nga makuha sa kontrobersyal nga si Ozamiz City Police Station commander C/Insp Jovie Espenido.
Kini tungod sa dili usab ordinaryo nga gipakita nga trabaho ni Espenido sa kampanya batok sa ilegal nga droga sa Ozamiz City.
Pasalig kini ni PNP chief Director General Ronald de la Rosa sa iyang pagbisita isip advance party ni Pres Rodrigo Duterte sa maong syudad kagahapong adlawa.
Una nang gihataga’g award ni Duterte si Espenido ug laing unom ka police officials tungod sa pagronda sa mga pinuy-anan sa mga Parojinog sa Ozamiz City niadtong Hulyo 30 ning tuiga.
Samtang emosyonal ug misamot ang kaikag nga magserbisyo ni Espenido tungod sa pagbisita ni Duterte ug De la Rosa sa Ozamiz City.
Kini human personal nga gisuta ni Duterte ug De la Rosa ang kahimtang sa kapolisan nga nakig-away sa mga pamilyang Parojinog sa maong syudad.
Namahayag si Espenido nga natandog siya sa dedikasyon ni Duterte nga nangunay pagsuta sa ilang kahimtang isip mga pulis sa Ozamiz City.
