CAGAYAN DE ORO CITY-Ikalipay ni Ozamiz City Police Station commander C/Insp Jovie Espenido nga mamatay siya sa igo sa bala tungod kay kabahin kini sa iyang trabaho isip pulis.
Kini ang tubag sa opisyal sa pangutana kon may mga hulga ba kining nadawatan sa kinabuhi human mapatay sa ilang operasyon si Mayor Reynaldo “Aldong” Parojinog Jr ug laing 15 ka mga biktima.
Matud ni Espenido nga andam siyang mamatay sa igo sa bala tungod kay pamatood kini nga gihimo niya ang iyang trabaho.
Asoy pa niini nga mas makakaulaw kon mamatay ang pulis sa sakit nga highblood.
Samtang giangkon ni Ozamiz City Police Station commander C/Insp Jovie Espenido nga nabati niya nga nasuko ug nahadlok kaniya ang mga residente sa San Roque Lawis, Ozamiz City.
Kini tungod sa nahitabo nga dugu-ong operasyon nga gikamatay sa 16 ka tawo.
Matud ni Espenido nga nasabtan niya ang gibati sa supporters sa pamilyang Parojinog apan nanawagan siya sa mga residente nga dili kahadlukan ang mga pulis apan ang mga kriminal.
Miapelar siya nga hunungon na ang mga pagpanghadlok ug mga espekulasyon sa ilang gihimo nga operasyon.
Siya miingon nga dili na padak-on ang isyu pinaagi sa pagpakatag sa text messages nga ilang rondahan ang 100
ka balay sa supporters sa mga Parojinog.
