Gipahugtan ang inspeksyon sa tanang pultahan sa pampubliko ug pribadong sementeryo sa Cagayan de Oro subay sa gipagawas nga opisyal nga ordinansa sa dakbayan niining Kalag-Kalag.
Gibutyag ni City Councilor Roger Abaday, Chairman sa Committee on Police, Fire, and Public Safety, nga striktong gidili ang pagdala og ilimnong makahubog, mga pabuto, hait nga kagamitan, ug mga sound system sa sulod sa mga sam-ang.
Gipasabot sa konsehal nga sumala sa gitakda nga lagda sa executive order, gitugot lang ang pagduaw gikan alas-6 sa buntag hangtod alas-10 sa gabii diin walay gitugotan nga magpalabay sa gabii o matulog sa mga lubnganan.
Busa, nanawagan ang buhatan sa publiko nga motahod sa patakaran aron magpabilin nga hapsay ug malinawon ang paghandom sa mga mipanaw nga minahal sa kinabuhi.
