CAGAYAN DE ORO CITY-Gihagit karon ni CIDG deputy director for operations Supt Melgar Devaras si kanhi Kinawe Brgy Kapitan Tarcisio Barros nga motahan na sa balaod ug dili na magtagu-tago.
Gihimo ni Devaras ang awhag dungan sa lima ka kaso nga napasaka sa piskalya batok sa kapikas ni Barros nga si incumbent Brgy Kapitana Cherry,duha nila ka anak ug laing 16 ka sakop niini.
Miingon si Devaras nga kabahin sa giatubang sa pamilyang Barros kinsa giingong mga miembro sa Kuratong Baleleng Gang ang murder,attempted homicide,direct assault,pagbaton sa ilegal nga armas ug illegal possession of explosives.
Samtang gihangyo ni PNP regional director C/Supt Timoteo Pacleb ang katawhan nga dili ihunong ang paghatag impormasyon kabahin sa presensiya sa nabiling sakop sa Parojinog Drug Group ning rehiyon.
Gihimo ni Pacleb ang pahayag dungan sa pagpasalamat sa katawhan nga mitabang sa PNP ug militar nga mabungkag
ang pipila ka miembro sa Kuratong Baleleng Gang nga naglihok sa Libona,Bukidnon.
Nakuha ang giingong private army sa magtiayong Barros dihang gilusob sa PNP-AFP joint operations diin daghang armas ang nakompiskar sa maong lugar sa miaging semana.
