CAGAYAN DE ORO CITY – Wala kahadloki ni kanhi Valencia City,Bukidnon Mayor Jose Galario Jr nga patyon kini sa kaubang convicted criminals sulod sa New Bilibid Prison o NBP.
Kini human gibulgar ni Galario ngadto kang Sen Bong Go ang klase-klase nga pangawarta nga hinimuan sa Bureau of Corrections o BuCor officials ngadto sa mga dalaw ug mismong mga pinisiro sama kaniya.
Miingon si Galario kinsa hilom mi-surender ug nagpapriso sa NBP nga mismo siya ang gikilkilan ni NBP hospital officer Dr Urcisio Cenas aron molihok ang iyang mga papeles.
Nasaksihan usab niini ang pipila ka druglords nga nagpatoo nga naospital apan mihimo diay sa illegal drug transactions sa ilang mga distributor gawas sa Bilibid.
Samtang nagtoo si NBP hospital officer Dr Urcisio Cenas nga inamigo lamang ang paghatag kaniya’g salapi ni Galario.
Kini human angkona ni Cenas nga gidawat niini ang gihatag ni Galario balor 8-mil pesos sa magkalahi nga higayon sulod sa Bilibid.
Gihimo ni Cenas ang pag-angkon dihang gigisa kini’g pangutana ni kanhi BuCor chief ug karon Sen Roland de la Rosa sa imbestigasyon sa senado kagahapong adlawa.
Giangkon ni Cenas nga nagsilbi kining doktor sa pipila ka druglords nga nagpatoo nga nagsakit apan dunay illega drug transactions sulod sa Bilibid hospital.
