CAGAYAN DE ORO CITY – Giangkon sa ilado nga datu sa grupong Kalumbay Lumad Organization nga kini dakong opisyal sa CPP-NPA ug natahasan sa lapad nga kontra-gobierno nga propaganda sa North Central Mindanao Regional Committee diin partikular natahasan maglihok dinhi sa dakbayan.
Kini ang makapakurat sa publiko nga rebelasyon ni Higaonon Datu Jumong Goaynon kinsa 20 ka tuig nga sakop sa CPP-NPA sa dihang gibulgar niini ang grupong Confederation for Unity Recognition and Advancement of Government Employees o COURAGE ang usa sa dakong organisasyon sa ilang grupo aron e-recruit ang mga empleyado sa gobierno ubos sa gitawag nga ‘white area’.
Miingon si Goaynon kinsa unang nadakpan kaniadto sa mga otoridad sa daghang kasong kriminal nga misulod siya sa kalihukan tungod sa mga tam-is apan mga bakak nga pasalig sa mga rebelde.
Napugos kini sa pagsalikway sa armadong pakigbisog kay nasabtan niini nga gigamit lamang ang mga lumad arom magpahimulos ang ilang tag-as nga mga opisyal sa CPP-NPA.
Una na usab giangkon niini nga sila ang utok sa pagpabakwit konohay sa mga mag-uumang lumad sa Sitio Mincamansi,Brgy Banglay, Lagonglong, Misamis Oriental aron magyampungan sa parke sa kapitolyo probinsyal kaniadto.
Sa pikas bahin,naghinobrang kurapsyon sulod sa CPP-NPA ang nag-unang rason usab ni alyas Inday kon nganong mihawa kini sa kalihukan.
Kini usab ang gipaambit ni alyas Inday kinsa 13 ka tuig nga finance officer sa Rural Missionary of the Philippines diin kabahin sa iyang tahas ang pag-solicit sa international organizations aron makatigom sa pondo ang armadong kalihukan.
Siya miingon nga kusog kaayo sila nga manaway sa kurapsyon sulod sa gobierno apan ultimo batakang suhulan nila isip lumilihok sa kalihukan ang gikawang diha kanila.
Una usab niini,giangkon ni Goaynon nga gumikan sa ilang pagbulgar sa daghang hinangal sa kalihukan,naghulat na kanila ang silot-kamatayon kon sila masikop sa mga aktibo nila nga kaubanan.
Dugtong niini,gisalikway na sa hingpit sa mga sakop sa Dept of Agrarian Reform Employees Association o DAREA ang pagsilbi nila nga aktibong sakop sa COURAGE.
Kini dungan sa pagbulgar nila ni Goaynon ug alyas Inday sa kalihukan ug mitabang na sa kampanya sa gobierno batok insurhensiya.
Gibutyag ni DAREA 10 regional president Modelita Mabaylan nga dili na sila makatugot nga magamit pa sa armadong kalihukan hinungdang mibulag sila sa legal front nga COUARGE.
Hisayrang dugay nang gipamugos sa militar ug PNP nga iya sa CPP-NPA ang COURAGE apan makadaghang higayon kining gihimakak sa ilang founder nga si Jose Maria Sison.
