CAGAYAN DE ORO CITY-Pagkabilanggo sa 80 ka tuig ang silot gipahamtang sa korte batok kanhi Pagatpat Brgy Kapitan Achilles Jude Babaran ning syudad.
Kini human nakit-ang ‘sad-an’ si Babaran sa gihimong paglugos sa makaduhang higayon sa 15 anyos nga menor de edad nga babaye sa syudad tuig 2015.
Miingon si Regional State Prosecutor Merlynn Uy nga bisan misibog na ang inahan sa biktima human bayri sa 250-mil pesos nga salapi apan milampos ang prosekusyon sa pagtaral sa akusado.
Gawas nga bilangguon si Babaran sa 80 ka tuig tungod sa 2 counts sa kasong rape,gimanduan usab kini nga bayran ang damyos nga kantidad 225-mil pesos.
Giangkon ni Uy nga naglisod sila pagpadaug sa kaso tungod sa kamatayon sa biktima nga sulod sa Sugo Hotel niadtong Hulyo 2016.
Samtang gipaningkamutan usab sa Bombo Radyo makuha ang panig ni Babaran pinaagi sa iyang abogado nga si Atty Brian Dale Mordeno apan gikanselar ang mga tawag sa telepono tungod sa kalapoys sa lawas kagabii.
