CAGAYAN DE ORO CITY – Napaslak na sa city jail ang retiradong empleyado sa city hall nga gitudlo nga sa mga senior citizen nga nangilad kanila pinaagi sa pagpangulekta’g tag-P300 isip membership fee sa usa ka foundation ning syudad.
Kini human nakit-an sa piskalya nga dunay basehan ang upat sa lima ka kasong pagpangilad batok sa akusado nga si Kris Sheila Neilles nga taga-Brgy Macasandig sa syudad.
Namahayag si Police Master Sgt Neil de las Alas sa Cogon Police Station nga dako ang tsansa nga makagawas si Neilles kay gamay ra ang gimando sa korte nga piyansa niini.
Si Neilles ang nagpaila nga provincial coordinator sa Pearl of the Orient International Marian Workers Missionary Foundation Corporation diin nagtanyag sa 2 milyon pesos nga debit card,house and lot ug 12-mil pesos nga monthly pension ngadto sa mga mailad nga senior citizens.
Samtang padayon ang pahimangno sa lokal nga kagamhanan sa syudad sa mga senior citizen nga dili magpailad sa mga investment scheme.
Gihimo ni City administrator Teddy Sabugaa ang pahimangno nunot na sa paglugwa sa grupo.
Si Sabugaa miingon nga taliwala nga nakasuhan na sa kasong kriminal ang suspek.
Nagtoo si Sabugaa nga daghan pa ang mga kauban niini nga mohimo’g pagpangilad sa mga tigulang.
Dugtong niini, giawhag ni Sabugaa ang mga senior citizen nga dili magpaggawas bisag gamay sa ilang salapi bugti sa mga dinagko nga return of investment.
