CAGAYAN DE ORO CITY – Gibulgar ni kanhi City Mayor Oscar Moreno ang gihimo sa kampo ni City Mayor Rolando ‘Klarex’ Uy nga daw grabe nang pagpa-rehistro sa pipila ka empleyado sa city hall ilabina sa job orders ug casuals aron mahimong botante sa Brgy Carmen ning syudad.
Wala hinoon giklaro sa kanhi mayor kon ang pagpa-rehistro sa City Comelec sa maong ihap sa mga empleyado kon tipik ba preparasyon sa Uy administration alang sa Brgy ug SK polls ning tuiga o sa 2025 midterm elections sa nasud.
Miingon si Moreno nga kini ang tipik sa mga rason kon nganong nagpa-rehistro usab siya sa Comelec aron apil sa makapili sa mga modagan nga mga kandidato sa October Brgy ug SK elections sa maong brgy.
Gipadumduman sa kanhi mayor si Uy nga dili e-tratar nga iyang personal property ang mandato nga gihatag kaniya sa katawhan sa syudad.
Samtang wala pa’y gihatag nga tubag niini ang kampo ni Mayor Klarex.
Miaging semana,apil si Moreno nga mipa-rehistro sa City Comelec kay daw gusto niya maka-apil sa mga kalihukan sa Brgy Carmen.
Una nang gibutyag ni Uy nga ang iyang anak nga si kanhi City Vice Mayor Rainer Joaquin ‘Kikang’ Uy ang ipadagan sa piliay sa brgy ning tuiga.
Hisayrang nakoloran ang pagpa-rehistro ni Moreno sa Comelec kay may nagduda nga molansad kini’g brgy kapitan sa labing dako nga brgy sa syudad diin posibleng ikasangka niini si Kikang nga kanhi niya bise-mayor sa dakbayan.
