CAGAYAN DE ORO CITY – Direktang gipadayag ni kanhi City Mayor Oscar ‘Oca’ Moreno nga dili imposible ang iyang pagsulod balik sa politika sa umaabot nga eleksyon dinhi sa dakbayan.
Kini bisan kon anaa ang ilang lig-on nga alyado sa politika ni City Mayor Rolando ‘Klarex’ Uy nga kasamtangang nagpadagan sa mga kalihukan sa dakbayan.
Miingon si Moreno nga wala nagpasabot nga nahanaw na siya sa public service nga dili na kini manginlabot sa mga panghitabo sa syudad.
Hinoon,dili klaro kon unsa nga posisyon ang sudlan sa kanhi mayor kon pananglitan seryoso ang tinguha niini pag-aktibong balik sa politika sa umaabot panahon.
Gipalanog kini sa kanhi mayor atol sa gitawag niya nga Christmas party sa pipila ka gi-imbitar nga mga sakop sa media sa dakbayan sa miaging gabii.
Hisayrang sa aktuwal nga kahimtang tali sa duha ka opisyal,hilom nga dunay wala pagsinabot sa pipila ka ‘key political supporters’ nila nga hayan mahimong basehan nga dili imposible nga masiak madugay ang ilang alyansa sa politika.
