CAGAYAN DE ORO CITY – Walay plano si kanhi City Mayor Oscar Moreno nga kasuha’g libelo si Konsehal James Judith nunot sa findings sa re-investigation sa special ECQ ayuda nga daw adunay pagkawala sa halos 50 milyones pesos nga salapi nga alang unta sa mga apektadong pamilya sa dakbayan sa COVID-19 sa tuig 2021.
Kini ang gipasalig ni Moreno sa katawhan pinaagi sa iyang pinili nga giimbitar nga mga sakop sa media sa syudad kagahapon sa hapon.
Miingon ang kanhi mayor nga gawas lang kon direkta nga miakusar si Judith nga siya kuyog sila kanhi city administrator ug former CSWD head Teodoro ‘Teddy’ Sabugaa Jr ug iyang overseer nga si Michael Fabillo nga sila mikawat sa maong pondo,dili kini magduha-duha’g kaso sa korte.
Dugang ni Moreno nga wala sa iyang kinaiya nga mokaso’g sakop sa media bisan kon kini giunsa’g batikos kay giila niya kini nga tipik sa demokrasya sulod sa serbisyo-publiko.
Samtang dakong insulto sa alang sa mga tawong naghago mahatag lang ngadto sa mga pamilya ang 767 milyones pesos nga ayudang pinansyal sa panahon nga grabe ang pag-igo sa ‘delta variant’ sa COVID-19 sa dakbayan.
Kini usab ang gipalanog nga pagka-dismaya ni Sabugaa nunot sa findings ni Judith nga angayang manubag si Moreno ug Fabillo sa giingong double-triple entries sa receiving beneficiaries.
Namugos Sabugaa nga bisan kolero wala kini makahawid sa maong pondo kay ang panudlanan sa dakbayan ang diretso midawat niini gikan sa buhatan ni kanhi Pres.Rodrigo Duterte.
