CAGAYAN DE ORO CITY – Gihukasan na sa pagka-abogado si Atty Elmer De la Rosa kinsa kanhi midagan pagka-mayor sa miaging piliay sa syudad.Kini human nakit-ang sad-an si De la Rosa sa Korte Suprema sa misconduct ug pagsupak sa code of professional responsibility.
Gihukasan sa pagka-abogado si De la Rosa gumikan sa giingong pagkahangol sa salapi.
Gibutyag usab sa Integrated Bar of the Philippines Board of Governors nga mas gipili sa abogado nga ang iyang personal nga interes imbis nga katagbawan sa iyang mga kliyente ug mga miembro sa Palalan CARP Farmers Multi-Purpose Cooperative diha sa Brgy Lumbia ning syudad.
Nagsumikad ang reklamo batok De la Rosa dihang nagsilbi kining ahente ug gibaligya ang yuta ingon man gipangbayran ang farmer-beneficiaries sa ilang shares.
Miingon ang Korte Suprema nga dunay sagol nga kurapsyon ang gihimo ni De la Rosa hinungdan nga gimanduan ang Office of the Bar Confidant nga wad-on na kini sa ilang listahan.
