CAGAYAN DE ORO CITY – Atbangan ni kanhi City Mayor Oscar Moreno si incumbent City Mayor Rolando ‘Klarex’ Uy sa 2025 elections ning syudad.Kini kon walay molugwa nga lig-ong kandidato sa maong posisyon aron banggaon si Klarex.
Namahayag si Moreno wala na siya’y angay pamatud-an sa iyang karera sa politika apan dili lang niini madawat nga daw nagka-gidlay na ang kahimtang sa dakbayan.
Nahinugon si Moreno nga naapsan na sa Iloilo City ug ubang mga syudad sa nasud ang kahimtang sa Cagayan de Oro rason nga kini andam mobalik sa pagpanerbisyo kon buligan sa katawhan.
Abli niya ang posibilidad nga makig-alyansa sa bando nila Misamis Oriental 2nd District Cong. Bambi Emano;Cagayan de Oro 2nd District Cong. Rufus Rodriguez ug Phividec Administrator Atty. Joseph Donato Bernedo kinsa bayaw ni Pres Bongbong Marcos.
Una niini,daghang higayon na usab gipanulti ni Klarex nga dili suliran kaniya kon modagan si Moreno atbang kaniya aron masukod kon kinsa ang dunay lig-on nga pagsalig gikan sa katawhan.
