CAGAYAN DE ORO CITY – Gikompirmar ni kanhi bise mayor Ceasar Ian Acenas nga wala pa siya makauli sa dakbayan human siya masikop sa CIDG-7 tungod sa ‘double your money scheme’ sa Cebu City.
Nagdumili si Acenas paghatag komento sa kontrobersya nga iyang giatubang base usab sa abiso sa iyang legal counsel.
Igo na lamang nanawagan si Acenas sa publiko nga dili siya hukman ug andam siya nga mohatag katin-awan kon tugtan na sa iyang abogado.
Kahinumduman nga kabahin si Acenas sa laing 4 nga nasikop tungod sa investment scam nga gikalambigitan sa kompaniyang Phoenix EA Holdings International Incorporated.
Samtang gibulgar sa kanhi presidente sa Cagayan de Oro Chamber of Commerce and Industry Incorporated nga kabahin siya sa nabiktima sa giingong investment scam nga gikalambigitan ni kanhi bise mayor Ceasar Ian Acenas.
Sumala sa negosyante nga si Ruben Vegafria nga nag-invest siya sa double-your-money scheme sa grupo sa scammer nga si Ailyn Hope Matulac diin Blitz Unlimited pa ang pangalan sa kompaniya ug dili Phoenix EA Holdings International Inc..
Nagdumili na si Vegafria pagbutyag kon pila ang iyang na-invest nga kwarta sa maong kompaniya.
Gani, nagtoo si Vegafria nga walay kalabutan sa sindikato si Acenas ug nabiktima lamang kini ilabina nga su-od nga higala niya ang founder sa grupo nga mao si Matulac.
