CAGAYAN DE ORO CITY – Walay giluwatan nga pahayag ug gilayong mituman sa iyang bag-ong tahas ang kanhi city director sa Cagayan de Oro City Police Office nga si Brigadier General Atty. Faro Antonio Olaguera isip bag-ong hepe sa kontrobersyal nga Police Drug Enforcement Unit o PDEG nga nakabase sa Camp Crame sa kauluhan.
Kini human siya itudlo ni DILG Secretary Benjamin Abalos Jr subay sa rekomendasyon sa kadagkuan sa National Police Commission si Olaguera aron pulihan si Brig Gen Narciso Domingo nga gi-relib sa katungdanan tungod sa ‘high profile cover up’ sa nakompiskar nga 990 kilos nga shabu sa Tondo,Manila sa miaging Oktubre 2022.
Nagsumikad ang kabag-uhan sa PDEG tungod sa Napolcom investigation human nabawi gikan kang dismissed Police Senior Master Sgt Rodolfo Mayo Jr ang sobra 900 kilos nga shabu nga balor 6.7 bilyones pesos.
Subay kang Abalos nga anaa sa sobra napulo ka police officers ang unang nasapon sa imbestigasyon nga mihimo’g pagtabon sa maong transaksyon.
Kini ang rason nga sila gimanduan pagduso’g leave of absense aron walay impluwensiya sa gihimong imbestigasyon.
Gani,mipalag si Domingo ug laing pipila ka top police officials sa pasangil nga sila apil usab sa nagdupa-dupa sa binilyong transaksyon sa ilegal nga droga.
Si Olaguera ang kanhi director sa PNP Legal Service ug miembro sa Philippine National Police Academy Class of 1989.
Hisayrang ayha kini nangulo sa legal team sa PNP,na-destino usab siya sa Filipino police attache sa Kingdom of Saudi Arabia sulod sa tuig ka tuig.
