CAGAYAN DE ORO CITY – Gisaway sa kanhi spokesperson ni Pres Rodrigo Duterte nga si Atty Harry Roque ang daut nga sistema sa hustisya sa nasud.
Kini human nadismaya si Roque sa dagan sa kaso sa Maguindanao massacre diin milungtad na’g 10 katuig apan wala pa mapaggawas ang promulgasyon batok sa mga akusado sa multiple murder case nga gipanguluhan sa pamilyang Ampatuan gikan sa probinsya sa Maguindanao.
Si Roque miingon nga competent si Quezon City Regional Trial Court Branch 221 Presiding Judge Jocelyn Reyes nga mohawid sa kaso apan nalangan ang promulgasyon tungod sa daut nga ‘judicial system’ sa nasud.
Samtang giawhag ni Atty Harry Roque ang publiko nga ipabati ang kasuko sa hinay nga dagan sa kaso sa Maguindanao massacre.
Kini tungod sa gihimong delaying tactics sa legal counsels sa mga Ampatuan nga gipanguluhan ni kanhi Mayor Andal Ampatuan Jr.
Ang hagit gihimo ni Roque nunot na sa kamatayon sa 58 ka tawo diin 32 niini ang mga sakop sa media nga gilakipan sa chief of reporters sa Bombo Radyo Koronadal nga si late Bombo Bart Marbella.
Sumala ni Roque nga kinahanglang hatagan sa konsiderasyon sa mga naghawid sa kaso ang posibilidad nga posibleng masinatian nila ang naagian sa pamilya sa masaker diin milungtad na sa 10 ka tuig ang ilang pagpangayo’g hustisya.
