CAGAYAN DE ORO CITY- Kasong pagbaton sa gidiling droga ang dugang atubangon ni kanhi City Mayor Omar Solitario Ali Salic nga giingong nakuhaa’g dos kilos nga gitoohang shabu sa iyang pinuy-anan sa Brgy Bangon, Marawi City kagahapong adlawa.
Kini human gi-ronda sa PNP ug militar ang pinuy-anan niini diin nakuha ang balor P10 milyon nga shabu nga gitaguan sa cabinet.
Gibutyag ni 1st ID,Philippine Army spokesperson Lt Col Jo-ar Herrera nga gihulat pa nila ang opisyal nga report sa ilang counterpart aron masuta ang detalye sa pagkabawi sa droga gikan sa balay ni Salic.
Si Salic ang unang gitumbok ni Pres Rodrigo Duterte kuyog si kanhi Marawi City Mayor Fajad ‘Pre’ Salic nga nalambigit sa narco-politics sa Lanao del Sur.
Nasuta usab nga si Salic ang kabahin sa gipadakop ni Martial Law administrator Defense Sec Delfin Lorenzana tungod sa pagsuporta sa kalihukan sa ISIS-Maute sa Marawi City.
