CAGAYAN DE ORO CITY – Nasignit sa hiniusang operasyon sa mga operatiba sa Philippine Drug Enforcement Agency 10 ug Philippine National Police ang kanhi municipal mayor nga aktibo nga bise-alkalde pinasikad sa court search warrant sa sulod iyang balay sa Brgy North Población,Guinsiliban,Camiguin.
Giila ni PDEA 10 regional director Alex Tablate ang dinakpan nga si Guisiliban Vice Mayor Helenio ‘Tata’ Abecia, 66 anyos nga molopyo sa probinsya.
Matud ni Tablate nga atol sa operasyon,giingong nakuhaan ang dinakpan sa lima ka sachets nga adunay sulod nga gitoohang shabu diin nagkantidad sa 102-mil pesos.
Sumala sa joint raiding team,nabawi usab ang ubang illegal drug paraphernalia, 9mm pistol kuyog ang 22 ka bala ug duha ka cellphones.
Nunot sa pasangil,kasuhan sa PDEA operatives sa piskalya ang suspek sa pagsupak sa Republic Act 9165/Dangerous Drugs Act of 2002.
Sa pagkutlo ning balita, wala pa’y gilugwa nga pahayag ang panig sa dinakpan kabahin sa pasangil batok kaniya.
Sa pagkatap sa impormasyon nga nadakpan si Abecia kagabii,nakurat ang kadaghanan sa ilang katawhan sanglit naila kini nga matarong nga pagka-opisyal sa maong lungsod.
Hisayrang unang gihulagway ang Camiguin sa PDEA 10 nga ‘drug-free’ itandi sa laing upat ka probinsya nga sakop sa Northern Mindanao region.
