CAGAYAN DE ORO CITY- Gikasuhan sa Ombudsman sa kasong kurapsyon si kanhi Jasaan Mayor Grace Jardin ug ang laing pito ka miembro sa Bids and Awards Committee o BAC sa Sandiganbayan.
Kini human akusahi sa Ombudsman nga nalambigit sa kurapsyon si Jardin kuyog ang BAC members diin usa ka construction company ang ilang gi-kontrata sa road project sa maong lungsod nga dili kuwalipikado.
Miingon ang Ombudsman nga dili patas ang bidding kay ang WGG Concrete Products and Mini-Hardware lamang ang partisipante ug walay laing competitors alang sa road project sa maong lungsod.
Gawas kang Jardin,gikasuhan sa pagsupak sa Anti-Graft and Corrupt Practicesd Act sa Sandiganbayan sila si Leo Casiño, Mark Allan Bagayna, Liza Gaurana, Emrick Tabequero, Arlene Dacoco ug Warren Gaurana.
Sa panig sa mga respondent,sila namugos nga dili tinuyo ang partisipasyon ni Liza Gaurana isip miembro sa BAC diin bana niini si Warren Gaurana nga tag-iya sa maong construction company.
