CAGAYAN DE ORO CITY – Mag-atubang sa patung-patong nga kasong kriminal ang kanhi municipal councilor sa lungsod sa Gannasi,Lanao del Sur.
Kini human itudlo sa mga otoridad nga si former Gannasi Councilor Ansary Marohomsar ang namusil sa gamit ang wala matino nga kalibre sa armas sa gikalalis niini apan miigo sa market vendor nga si Joseph Saragina sa Sarimanok,Brgy Marawi Poblacion,Marawi City.
Namahayag si Police Regional Office Bangsamoro Autonomous Region Director Brig Gen John Guyguyon nga subay sa inisyal nga imbestigasyon sa Marawi City Police Station nga personal nga dumot ug bangi sa gugma ang gitoohang motibo ni Marohomsar aron pusilon ang wala panganli nga target niini.
Kabahin sa posibleng kasong atubangon sa suspek ang pagpamusil,pagbaton sa ilegal nga armas ug ang paggamit sa government ambulance isip get away vehicle aron atakehon ang iyang gikabangi.
Hinoon,luwas ra ang market vendor nga nadamay sa pagpamusil kay bukton lang ang igo niini.
Gimando usab sa heneral ang subsob nga operasyon aron madakpan ang nakasibat ug nagtagu-tago nga suspek sa pagpamusil sa miaging 15 sa Marso 2023.
