CAGAYAN DE ORO CITY – Gi-konbikto sa korte sa kasong kidnapping ug serious illegal detention with murder ang usa doktor nga kanhi nag-trabaho isip resident physician sa Northern Mindanao Medical Center o NMMC ug laing Romano Maute sa Brgy Poktan,Butig,Lanao del Sur sa tuig 2016.
Kini human napamatud-an sa korte nga sad-an ni Dr Russel Langi Salic ug Maute nga konektado sa grupong Maute kinsa midagit sa pito ka sibilyan diin duha niini ang gipangputla’g ulo sa maong tuig.
Miingon si Executive Sec Salvador Medialdea nga subay sa hukom sa korte sa kaso gibuhian sila Gabriel Permitis, Alfredo Cano-os, Esperanza Janubas, Adonis Mendez ug Julito Janubas rason nga kini ang nakatudlo kang Dr Salic nga kabahin siya Maute group.
Gani,gusto usab kuhaon sa Amerika si Salic kay apil kini sa nagplano kaniadto nga bombahan ang pipila ka aktibidad sa New York City,USA.
Apan pulos gihimakak ni Salic ang pasangil ug namugos nga wala siya sukad makadalikyat sa Butig ug nag-apil usab daw kini sa Philippine Orthopaedic Association Mid-year Convention sa Puerto Princesa, Palawan hinungdang imposible nga mabuhat niini ang kremin.
Samtang dili ihikaw ni Pres Rodrigo Duterte nga kuhaon sa US govt si Salic aron mangatubang sa laing kasong kriminal sa New York City,Estados Unidos.
Kini nunot sa pagkahukmi na ni Salic sa mga kaso nga giatubang niini sa korte sa kauluhan tungod sa pasangil pagdagit sa pito ka sibilyan diin duha kanila ang gipangputla’g li-og sa tuig 2016.
Gibutyag ni Duterte nga nagpasalamat kini sa pagtinabangay sa law enforcement agencies aron madutlan sa kaso mga akusado.
Hisayrang sa panahon ni Duterte mihimo’g dagko nga opensiba ang grupong Maute hangtod nga gisulaya’g ilog ang Marawi City sa tuig 2017.
