CAGAYAN DE ORO CITY-Gipalig-on pa sa simbahang Katoliko ug ubang kristohanong katilingban ang ilang baruganan nga supakon sa ikaupat nga higayon ang katukuran sa casino o balay pasugalan sulod sa luna nga iya sa kompanyang Limketkai & Sons ning syudad.
Kini human gibasa sa kaparian ang pastoral letter ni Cagayan de Oro Archdiocese Archbishop Antonio Ledesma atol sa anti-casino forum sa Xavier University sa syudad kagahapong adlawa.
Miingon si Msgr Elmer Abacahin nga kusganong gibarugan sa simbahan ang pagdili sa pagpadagan sa tanang legal ug illegal nga pasugal sa syudad.
Samtang giibulgar sa kanhi opisyal sa Philippine Amusement and Gaming Corporation o PAGCOR ang peligro nga dala sa pagka-addict ug dula sa mga sugal sulod sa casino.
Gipaambit ni kanhi PAGCOR supervisor Rodolfo Llacer nga daghan siya’g nasaksihan nga adunahang tawo ug mga negosyante nga nawad-an sa kinitaan gumikan sa paghinobra’g dula sa casino.
Si Llacer kinsa 20 ka tuig nga trabahante sa PAGCOR miingon nga mibati kini’g konsensiya kay nasaksihan niya nga kabahin siya sa nakapaguba sa mga pamilya tungod sa casino.
Kini ang hinungdan nga mi-resign siya sa iyang trabaho ug kusganong nag-abdokasiya pagbatok sa casino.
Samtang,gibarugan sa pipila ka konsehal sa konseho nga adunay mahatag nga kaayuhan ang pagsulod sa casino sa pipila ka mga hotel sa syudad.
Si Kag Romeo Calizo,kinsa chairman sa police,fire and public safety ug vice chairman usab sa games and amusement committee sa konseho miingon nga dili mausab ang iyang baruganan nga suportahan ang pagtukod sa casino sa dakbayan.
Apan gibutyag ni Calizo nga angay usab nga dili maapektuhan ang aspeto sa moralidad ilabina sa kabatan-unan kon tugutan ang katukuran niini.
Dumduman,tuig 1993 nakasulod ang casino diha sa gisirad-an nga Pryce Plaza Hotel apan gipatak-upan,subli misulay pagbalik sa tuig 2001,2008 ug karong tuiga.
