CAGAYAN DE ORO CITY – Angayang mabasura kay dakong kataw-anan ug pagkawalay unod sa findings sa adhoc committee nga nag-imbestigar sa gitoohang anomaliya sa sobra 700 milyones pesos nga special ECQ ayuda ning syudad.
Kini ang pag-angkon ni social services committee chairman Konsehala Girlie Balaba sa gipamugos ni adhoc committee chairman Kag. James Judith nga dunay angayang manubag sa giingong pagwaldas sa pondo sa katawhan sa tuig 2021.
Miingon si Balaba nga nangunsulta usab kini kang kanhi Pres Rodrigo Duterte kinsa iyang abogado sa maong lantuging legal sa konseho nga walay hinungdan ang gipasiatab ni Judith rason nga angay na kining mabasura.
Bisan kon gitawag nga walay pulos ni Balaba ang findings ni Judith apan gihangyo usab nila ang DILG ug DSWD nga maoy mo-imbestigar sa ayuda isyu ug dili ang konseho.
Samtang wala sa konseho ang katungod nga mosulti nga angayag ibasura na lang ang unod sa findings sa re-investigation sa adhoc committee kabahin sa sobra 700 milyones pesos nga special ECQ ayuda sa dakbayan.
Kini ang tubag ni adhoc committee vice chairman Kag. Roger Abaday sa gipamugos ni Balaba.
Siya miingon nga kini ang rason nga gihinayon niya ang pagduso’g resolusyon aron mahagit si Judith nga ipadayon ang pag-imbestigar aron moabot ang kaso sa Ombudsman.
Hisayrang tipik sa findings ni Judith nga daw angayang manubag sila kanhi City Mayor Oscar Moreno,kanhi city administrator Teddy Sabugaa ug former CSWD officer Michael Fabello.
