Gihukma’g guilty sa kasong korapsyon ang kanhi presidente sa Peru nga si Martin Vizcarra.
Ang korte nagmando nga silotan kini sa katorse ka tuig nga pagkabilanggo human namapatud-an nga siya midawat sa suhol gikan sa mga kompanya sa konstruksyon samtang gobernador pa kini rehiyon sa Moquegua.
Ang suhol nga nadawat mikantidad sa $640,000 aron ihatag ang kontrata sa gipaboran nga kontratista nga maoy mihawid sa proyekto sa irigasyon ug pagtukod og ospital.
Nahitabo kini tali sa tuig 2011 hangtod 2014, sa wala pa siya mahimong presidente sa Peru.
Una nang nagtuo ang kampo sa kanhi presidente nga pagpamulitika ug pagpanimalos ang motibo sa gisang-at nga kaso. Hisayran nga midugang si Vizcarra sa taas nga listahan sa mga kanhi presidente nga napriso sa maong nasud.
Kini gilangkonan nila kanhi Peruvian Presidents Alejandro Toledo, Ollanta Humala ug Pedro Castillo.
Si Alberto Fujimori napriso sa kapin 15 ka tuig.
Gipagawas kini sa prisohan sa tuig 2023 ug namatay sa musunod nga tuig sa edad 86.
