CAGAYAN DE ORO CITY – Ipadayon sa kapolisan ang imbestigasyon kabahin sa dunggu-ong bangga tali sa Kia Sorrento nga sakyanan batok sa Toyota Revo nga nag-resulta sa kamatayon sa retiradong huwes sa korte ug pagkaangol sa pito ka sakop sa banay sa Brgy Lumbia ning syudad.
Unang giila sa kapolisan ang namatay’ng biktima nga si retired RTC Judge Gael Paderanga Jr, 72 anyos nga nagpuyo sa Smart Condominium,Upper Carmen ning dakbayan.
Giila usab ang Toyota Revo driver nga si Joshua Dequiña,46 anyos nga nanimuyo sa Brgy Mambuaya ning dakbayan.
Subay sa initial nga imbestigasyon sa kapolisan,gitoohan nga mi-atake ang gihambing sakit sa kanhi huwes samtang nagmaneho hinungdan nasungag niini ang Revo.
Paspas gidala sa J.R. Borja Hospital si Paderanga apan dead on arrival na kini samtang si Dequiña kuyog ang iyang kapikas ug laing lima ka pasahero ang gidala usab sa Northern Mindanao Medical Center.
Hinoon,walay nakaangko’g seryosong kahimtang sa panig ni Dequiña gawas lang nga dunay bata nga nabilian sa tiil kagahapon sa buntag.
