MANILA – Gituldukan na sa tigpamaba sa Liberal Party ug kanhi Senador Leila de Lima ang pangutana kung mulansad ba kini sa pagkasenador sa 2025 elections.
Gibutyag sa kanhi senador, wala siya’y plano nga modagan sa bisan unsang posisyon tungod kay nagpabilin siyang “committed” sa ubang prayoridad sa ilang partido, sama sa pagpakusog sa adbokasiya ug pagtubag sa pipila ka isyu sa iyang personal nga kinabuhi.
Si De Lima nihimo sa pamahayag taliwala sa pipila nga nag-ingon nga posibleng mausab ang iyang huna-huna tungod kay aduna pay tolo ka buwan sa dili pa ang opisyal nga panahon alang sa pag-file sa certificates of candidacy.
Sa laing bahin, unang miingon ang kanhi senador nga nagplano ang iyang kampo nga mupasaka sa kontra-demanda batok nila kanhi Presidente Rodrigo Duterte ug kanhi justice secretary Atty.Vitaliano Aguirre tungod sa tinumotumo ug politically motivated nga mga kaso nga gihampak kaniya sa tuig 2017.
