CAGAYAN DE ORO CITY, Philippines – Pabor ang usa ka senador nga hatagan sa executive session ang gidismis nga mayor sa Bamban Tarlac nga si alyas “Alice Guo” o si Guo Hua Ping sa tinood nga kinabuhi.
Segun ni Senate Majority Leader JV Ejercito nga may tsansa nga ihatag ang espesyal nga sesyon aron paspas nga makamugna sa resolusyon ang komite ni Senador Risa Hontiveros nga maoy gamiton sa pagpasaka’g kaso.
Tungod sa pagpanago ni Guo sa sensitibo ug kritikal nga mga impormasyon sa katukuran sa ilegal nga POGO Hubs, nagduda ang magbabalaod nga posibleng ispiya ang kanhi mayor, aron maka-access sa lihok sa gobyerno, gikan sa naka-posisyon nga Chinese Syndicates sa managlahing lokasyon sa Asya.
Si Huang Zhiyang maoy gitumbok nga “bosses of all boss” sa POGO hubs sa Pilipinas, ug may kasong pagpameke sa iyang pagkatawo gamit ang lima ka pekeng chinese passports.
Unang nadiskobrehan sa senado nga business partner ni Guo ang notoryos nga Chinese Syndicate.
Sama sa kondisyon ni Senador Joel Villanueva, gusto ni Ejercito nga mahitabo na ang “tell all” ni Guo sa pag-resume sa session, unyang alas 9 sa buntag didto sa Senado.
